கொரோனா வைரஸ் பரவுவதை தடுக்க, மத்திய - மாநில அரசுகள், ஊரடங்கு உத்தரவை அமல்படுத்தியது.
இதன் அடிப்படையில், தமிழ்நாடு கிராம வங்கியின் சார்பில் வெளியிடப்பட்ட சுற்றறிக்கையில், 50 சதவீத ஊழியர்களுடன் முக்கியமான பணிகள் மேற்கொள்ளப்படும் எனவும், மீதமுள்ள ஊழியர்கள், சுழற்சி முறையில் வீட்டில் இருந்து பணியாற்ற வேண்டும் எனவும் தெரிவிக்கப்பட்டிருந்தது.
ஊரடங்கு உத்தரவை அடுத்து, சேலம் மாவட்டத்தில் உள்ள தமிழ்நாடு கிராம வங்கியைச் சேர்ந்த 168 பணியாளர்கள், தங்கள் சொந்த ஊர்களுக்குச் சென்றனர்.அவர்களை, உடனடியாக பணிக்குத் திரும்பும்படி, வங்கியின் பொது மேலாளர் உத்தரவு பிறப்பித்தார்.
இந்த உத்தரவை எதிர்த்து சேலம் மாவட்டத்தில் உள்ள தமிழ்நாடு கிராம வங்கி ஊழியர்கள் சென்னை உயர் நீதிமன்றத்தில் வழக்கு தொடர்ந்தனர். இந்த வழக்கை நீதிபதி ரவிச்சந்திரபாபு விசாரித்தார்.
விசாரணையின் போது, வங்கி தரப்பில் ஆஜரான வழக்கறிஞர், வங்கியின் 168 ஊழியர்களும் சொந்த ஊர்களுக்குச் செல்ல எந்த அனுமதியும் வழங்கவில்லை எனவும், வீட்டில் இருந்து பணியாற்ற அறிவுறுத்தப்பட்டதாகவும், அவர்கள் சொந்த ஊர்களுக்குச் சென்றது சட்டவிரோதம் எனவும் வாதிட்டார்.
இதை பதிவு செய்த நீதிபதி, அரசு அறிவித்துள்ள நிதியுதவியை, பயனாளிகளுக்கு வழங்க வேண்டியுள்ளதால், 168 ஊழியர்களையும் உடனடியாக பணிக்கு திரும்ப வேண்டும் என உத்தரவிட்டார்
. சொந்த கிராமங்களுக்கு அருகில் உள்ள கிளைகளில் பணியாற்ற அனுமதி கோரி சம்பந்தப்பட்ட அதிகாரியை அணுக வேண்டும் எனவும், அனுமதி கிடைக்காவிட்டால் சேலத்திற்கு பயணப்பட, உரிய பயண அனுமதியைப் பெற்று பணிக்கு திரும்ப வேண்டும் எனவும் உத்தரவிட்டார்.
No comments:
Post a Comment