MCA படிப்பு காலம் குறைப்பு

MCA படிப்பு காலம் குறைப்பு

 மூன்று ஆண்டுகளாக இருந்த எம்.சி.ஏ., படிப்புக்கான காலத்தை 2 ஆண்டுகளாக குறைத்து ஏஐசிடிஇ அறிவித்துள்ளது.

இது தொடா்பாக அகில இந்திய தொழில்நுட்பக் கல்வி குழுமம் (ஏஐசிடிஇ) வெளியிட்டுள்ள அறிவிப்பில் கூறியிருப்பது:

ஏஐசிடிஇ விதிகளின்படி எம்சிஏ படிப்பு இதுவரை மூன்று ஆண்டுகளாக இருந்த நிலையில், இனி இரண்டு ஆண்டுகளாக மாற்றப்படுகிறது.

கடந்த ஆண்டு பல்கலைக்கழக அனுமதி குழுவின் 545- ஆவது கூட்டம் நடத்தப்பட்டது. இந்தக் கூட்டத்தில், எம்சிஏ படிப்பின் கால அளவை 2 ஆண்டுகளாக மாற்றம் செய்ய ஒப்புதல் அளிக்கப்பட்டது.

இதனடிப்படையில் 2020-2021-ஆம் ஆண்டு முதல், எம்சிஏ படிப்பு அனைத்து பல்கலைக்கழகங்களிலும் இனி இரண்டு ஆண்டுகளாக மாற்றப்படுகிறது.

அங்கீகரிக்கப்பட்ட பல்கலைக்கழகங்களில் 2020-2021-ஆம் ஆண்டு முதல் எம்சிஏ படிப்பில் சேர பிசிஏ., அல்லது பிஎஸ்சி., கம்ப்யூட்டா் சயின்ஸ் அல்லது அதற்கு சமமான படிப்பு அல்லது பி.காம்., பிஎஸ்சி., பிஏ., படித்தவா்கள், பிளஸ் 2 வகுப்பில் கணிதத்தைப் பாடமாக படித்திருக்க வேண்டும். இளங்கலை படிப்பில் 50 சதவீத மதிப்பெண் எடுத்திருக்க வேண்டும்.

எம்சிஏ., படிப்பு 2 ஆண்டுகளாக மாற்றப்படுவது 2020-21-ஆம் ஆண்டில் இருந்து அமலுக்கு வர வேண்டும் என்று அறிவிக்கப்பட்டுள்ளது. எம்சிஏ., படிப்பு இரண்டு ஆண்டுகளாக மாற்றப்பட்டுள்ளதால் பாடத்திட்டமும் மாற்றி அமைக்கப்பட உள்ளது.

இவ்வாறு அதில் தெரிவிக்கப்பட்டுள்ளது.