இம்மாநிலத்தில் நவம்பர் 1 முதல் பள்ளிகள் திறக்கப்படும்: அரசு அறிவிப்பு

 இம்மாநிலத்தில் நவம்பர் 1 முதல் பள்ளிகள் திறக்கப்படும்: அரசு அறிவிப்பு

அசாமில் நவ.1-ம் தேதி முதல் பள்ளிகள் மீண்டும் திறக்கப்படும் என்று அம்மாநில அரசு தெரிவித்துள்ளது. அதேபோல ஹரியாணாவில், சூழல் சரியாக இருக்கும்பட்சத்தில் அக்.15-ல் இருந்து பள்ளிகள் திறக்கப்படும் என்று தெரிவிக்கப்பட்டுள்ளது.

கரோனா வைரஸ் பரவியதன் காரணமாக ஊரடங்கால் கடந்த மார்ச் மாதம் முதல் பள்ளிகள் மூடப்பட்டுள்ளன. நடப்புக் கல்வி ஆண்டுக்கான பாடங்கள் தற்போது ஆன்லைன் மூலம் மாணவர்களுக்கு நடத்தப்பட்டு வருகின்றன. இந்நிலையில் அக்.15-ம் தேதி முதல், பள்ளிகளைத் திறக்கலாம் என்று மத்திய அரசு தெரிவித்துள்ளது. இதுகுறித்து மாநில அரசுகளே முடிவுசெய்து கொள்ளலாம் என்று அறிவித்து, அதற்கான வழிகாட்டு நெறிமுறைகளையும் வெளியிட்டுள்ளது

இதற்கிடையே அசாம் மாநிலத்தில் நவ.1-ம் தேதி முதல் பள்ளிகள் மீண்டும் திறக்கப்படும் என்று அம்மாநில அரசு தெரிவித்துள்ளது. இதுகுறித்து இன்று செய்தியாளர்களிடம் பேசிய கல்வித்துறை அமைச்சர் ஹிமாந்த பிஸ்வா சார்மா, ''கரோனா பரவலைத் தடுக்க ஆன்லைன் வகுப்புகள் நடத்தப்பட்டு வருகின்றன

இந்நிலையில் தற்போது நவம்பர் 1-ம் தேதி முதல் பள்ளி, கல்லூரி மற்றும் பல்கலைக்கழகங்கள் மீண்டும் திறக்கப்பட உள்ளன. இதற்கான நிலையான வழிகாட்டு நெறிமுறைகள் அக்டோபர் 15-ம் தேதி வாக்கில் வெளியிடப்படும். எனினும் கல்லூரி மற்றும் பல்கலைக்கழகங்களில் உள்ள விடுதிகள் திறக்கப்பட வாய்ப்புகள் குறைவே'' என்று அமைச்சர் ஹிமாந்த பிஸ்வா சர்மா தெரிவித்தார்.

ஹரியாணா மாநிலத்தில், கரோனா பரவல் கட்டுக்குள் வந்து, சூழல் சரியாக இருக்கும்பட்சத்தில் அக்.15-ல் இருந்து பள்ளிகள் திறக்கப்படலாம் என்று தெரிவிக்கப்பட்டுள்ளது.

இதுகுறித்து அம்மாநிலக் கல்வித்துறை அமைச்சர் கன்வர் பால் கூறும்போது, ''6 முதல் 9-ம் வகுப்பு வரையிலான மாணவர்களுக்கு, மீண்டும் பள்ளிகளைத் திறக்கத் திட்டமிட்டுள்ளோம். எல்லாம் திட்டமிட்டபடி நடைபெற்றால் அக்.15 முதல் பள்ளிகள் திறக்கப்படும். வருங்காலத்தில் இறுதி முடிவுகள் எடுக்கப்படும்'' என்று தெரிவித்தார்.