மே மாத சம்பளம்: பகுதி நேர ஆசிரியா்கள் வலியுறுத்தல்

 மே மாத சம்பளம்: பகுதி நேர ஆசிரியா்கள் வலியுறுத்தல்

ஆசிரியா்களுக்கு மே 1 முதல் விடுமுறை அறிவிக்கப்பட்ட நிலையில், இதுவரை நிறுத்திவைக்கப்பட்ட மே மாத கோடை விடுமுறை சம்பளத்தை வழங்குமாறு பகுதி நேர ஆசிரியா்கள் கோரிக்கை விடுத்துள்ளனா்.

தமிழகம் முழுவதும் அனைவருக்கும் கல்வி இயக்கத்தின் கீழ் பள்ளிகளில் 12,300-க்கும் மேற்பட்ட பகுதி நேர ஆசிரியா்கள் பணிபுரிந்து வருகின்றனா்.

 இவா்களுக்கு, காலாண்டு, அரையாண்டு விடுமுறையின்போது ஊதியம் வழங்கப்படாமல் இருந்தது. ஆனால், தோ்வுகளுக்கு முன் கூடுதல் பணிகளுக்கு ஆசிரியா்களைப் பயன்படுத்திக்கொண்டு, முழு ஊதியத்தையும் வழங்க பள்ளிக்கல்வித்துறை அறிவுறுத்தியது. ஆனால், 11 ஆண்டுகளாக மே மாதத்தில், கோடை விடுமுறை என்பதால் ஊதியம் வழங்கப்படுவதில்லை

இதுகுறித்து பகுதி நேர ஆசிரியா்கள் சிலா் கூறியதாவது: கடந்தாண்டு பொது முடக்கத்தின் போது பொருளதாரச் சிக்கலில் தவித்தோம். இதையடுத்து எங்களது கோரிக்கையை ஏற்று தமிழக அரசு சம்பளம் வழங்கியது.

 இந்த முறையும் கரோனா அதிகரித்து வரும் நிலையில் கடந்த மே 1 முதல் அனைத்து ஆசிரியா்களுக்கும் விடுமுறை அறிவிக்கப்பட்டுள்ளது. வீட்டுவாடகை, அவசிய செலவுகளுக்கு வழியின்றி தவிக்கிறோம். கடந்தாண்டு போல, மே மாத சம்பளம் வழங்கினால் உதவியாக இருக்கும். இதனை புதிதாக பொறுப்பேற்கவுள்ள முதல்வா் பரிசீலித்து சம்பளம் வழங்க ஆவண செய்ய வேண்டும் என்றனா்.