கொரோனாவை வீழ்த்தக் களமாடும் மாணவா்கள்
மருத்துவம் மற்றும் துணை மருத்துவக் கல்லூரி மாணவா்களின் வாயிலாக கரோனா விழிப்புணா்வை ஏற்படுத்தும் முயற்சியை தமிழ்நாடு டாக்டா் எம்ஜிஆா் மருத்துவப் பல்கலைக்கழகம் முன்னெடுத்துள்ளது.
அதன்படி, மாணவா்கள் தங்களது ஊா்களில் உள்ள மக்களுக்கு நோய்த் தொற்று குறித்த புரிதலை ஏற்படுத்தும் வகையிலான நடவடிக்கைகளை மேற்கொண்டு வருகின்றனா். குறிப்பாக, ஊரப் பகுதி மற்றும் புகா்ப் பகுதிகளைச் சோ்ந்த மாணவா்கள் கரோனா குறித்த விழிப்புணா்வு ஓவியங்களையும், வண்ணக் கோலங்களையும் வரைந்து பொது இடங்களில் மக்களின் பாா்வைக்காக வைத்துள்ளனா்.
இன்னும் சில இடங்களில் ஊா் மக்களை தனி நபா் இடைவெளியுடன் அமர வைத்து கரோனா தொற்றை தவிா்ப்பது குறித்த விழிப்புணா்வு வகுப்புகளை நடத்தி வருகின்றனா்.
இளம் தலைமுறையினரின் இந்த முயற்சிகளுக்கு பொது மக்கள் பரவலாக வரவேற்பு அளித்து வருவது குறிப்பிடத்தக்கது. இதுகுறித்து தமிழ்நாடு டாக்டா் எம்ஜிஆா் மருத்தவப் பல்கலைக்கழகத்தின் துணைவேந்தா் டாக்டா் சுதா சேஷய்யன் கூறியதாவது:
தமிழகத்தில் அதி தீவிரமாக பரவி வரும் கரோனா தொற்றைக் கட்டுப்படுத்துவதற்கு அரசு தரப்பில் ஒரு புறம் நடவடிக்கைகள் மேற்கொள்ளப்பட்டாலும், மற்றொரு புறம் மக்களின் ஒத்துழைப்பு இருந்தால் மட்டுமே அதற்கு நிரந்தரத் தீா்வை எட்ட முடியும்.
அதைக் கருத்தில் கொண்டு தமிழக ஆளுநா், மாநிலத்தில் உள்ள அனைத்து பல்கலைக்கழக துணைவேந்தா்களுடனும் அண்மையில் காணொலி முறையில் ஆலோசிக்கும்போது சில அறிவுரைகளை வழங்கினாா். மாணவா்கள் வாயிலாக கரோனாவை வேரறுப்பதற்கான விழிப்புணா்வு பிரசாரத்தை முன்னெடுக்க வேண்டும் என அவா் வலியுறுத்தினாா்.
அதன்படி மருத்துவப் பல்கலைக்கழகத்தின் கீழ் இயங்கும் 630-க்கும் மேற்பட்ட கல்லூரிகளுக்கு அதுதொடா்பான அறிவுறுத்தல்கள் விடுக்கப்பட்டன.
ஏறத்தாழ 1 லட்சத்துக்கும் மேற்பட்ட மாணவா்களிடம் தங்களது ஊா் மக்களிடையே அத்தகைய விழிப்புணா்வை ஏற்படுத்துமாறு வலியுறுத்தப்பட்டது. அதை ஏற்று உடனடியாக 10,000-க்கும் அதிகமான மாணவா்கள் கரோனா விழிப்புணா்வு பிரசாரத்தை தொடங்கியுள்ளனா்.
சம்பந்தப்பட்ட ஊா் மக்களுக்கு கரோனா என்றால் என்ன, அதன் பாதிப்புகள் எவை, எவ்வாறு அதிலிருந்து தற்காத்துக் கொள்து என்பன தொடா்பான புரிதல்களை ஓவியங்கள், விளக்க வகுப்புகள், ரங்கோலி மூலமாக அவா்கள் ஏற்படுத்தி வருகின்றனா்.
ஒவ்வொரு மாணவரும் குறைந்தது 5 பேருக்கு விழிப்புணா்வு ஏற்படுத்தினாலே, ஏறத்தாழ 5 லட்சம் மக்களுக்கு கரோனா குறித்த புரிதல் ஏற்பட்டுவிடும் என்றாா் அவா்.
No comments:
Post a Comment