மாற்றுத்திறன் மாணவா்களுக்கு கல்வி கற்பிக்கும் சிறப்பு பயிற்றுநா்கள் பணி நிரந்தரம் கோரி ஆா்ப்பாட்டம்

 மாற்றுத்திறன் மாணவா்களுக்கு கல்வி கற்பிக்கும் சிறப்பு பயிற்றுநா்கள் பணி நிரந்தரம் கோரி ஆா்ப்பாட்டம்

தமிழ்நாடு ஒருங்கிணைந்த பள்ளிக் கல்வியில் உள்ளடக்கிய கல்வித்திட்டத்தில் பணியாற்றி வரும் சிறப்பு பயிற்றுநா்கள் மற்றும் பிற பணியாளா்களை பணி நிரந்தரம் செய்ய வலியுறுத்தி சென்னையில் உள்ள டிபிஐ வளாகத்தில் வெள்ளிக்கிழமை ஆா்ப்பாட்டம் நடைபெற்றது.

இது குறித்து தமிழ்நாடு ஒருங்கிணைந்த பள்ளிக் கல்வித் திட்ட மாற்றுத் திறன் மாணவா்களுக்கான சிறப்பு பயிற்றுநா்கள் சங்கத்தினா் செய்தியாளா்களிடம் கூறியது: தமிழக பள்ளிக் கல்வித்துறையில் ஒருங்கிணைந்த பள்ளிக் கல்வித் திட்டத்தின் கீழ் அனைத்து வகை பள்ளிகளில் பயிலும் மாற்றுத்திறன் மாணவா்களுக்காக 1,761 சிறப்பு பயிற்றுநா்கள் உள்பட 3 ஆயிரத்துக்கும் மேற்பட்டோா் பணியாற்றி வருகின்றனா். இவா்கள் மனவளா்ச்சி குறைபாடு, நரம்பியல் குறைபாடு, காது கேளாமை, டெளன் சிண்ட்ரோம், ஆட்டிசம் உள்ளிட்ட பாதிப்புகள் உள்ள 2 லட்சம் குழந்தைகளுக்கு சிறப்புக் கல்வி அளித்து வருகின்றனா். மிகக் கடும் பாதிப்புள்ள குழந்தைகளுக்கு அவா்களின் வீடுகளுக்கே சென்று மறுவாழ்வு பயிற்சி அளிக்கப்படுகிறது

அந்த வகையில் தஞ்சாவூா் மாவட்டம் பேராவூரணி ஒன்றிய வள மையத்தில் பணியாற்றும் சிறப்புப் பயிற்றுநா் சுமதி, கடந்த ஜன.21-ஆம் தேதி சாய்தோப்பு கிராமத்தில் உள்ள ஒரு மாணவரின் இல்லத்துக்குப் பயிற்சி அளிக்கச் சென்றாா். பயிற்சி முடிவடைந்து அந்த வீட்டிலிருந்து வெளியே வரும்போது, அருகில் இருந்த தென்னை மரத்திலிருந்து தென்னங்குலை அறுந்து சிறப்பு பயிற்றுநரின் முதுகில் விழுந்தது. இதனால் பலத்த காயமடைந்த சுமதி தற்போது தனியாா் மருத்துவமனை ஒன்றில் சோ்க்கப்பட்டு சிகிச்சை பெற்று வருகிறாா். அவருக்கு முதுகு தண்டுவடம் மூன்று இடத்தில் உடைந்திருப்பதாக மருத்துவ அறிக்கை தெரிவிக்கிறது. முதுகுத் தண்டுவடம் முறிவில் இடுப்புக்கு கீழ் உள்ள பகுதிகள் முழுவதுமாக செயலிழந்து உயிருக்குப் போராடி வருகிறாா். பணி நேரத்தில் நடந்த இந்த விபத்துக்கு அரசின் சாா்பில் எந்தவித உதவியும் அளிக்கப்படவில்லை.

சிறப்பு பயிற்றுநா் பதவியில் ஈடுபட்டுள்ளவா்களில் 80 சதவீதம் போ் பெண்கள் ஆவா். கடந்த சில ஆண்டுகளாக பணி நேரத்தில் விபத்துக்குள்ளாகி பத்துக்கும் மேற்பட்ட சிறப்பு பயிற்றுநா்கள் உயிரிழந்துள்ளனா். அவா்களுக்கு அரசின் சாா்பில் எந்தவித கருணைத் தொகையும் வழங்கப்படவில்லை. இத்தகைய சூழலில் பணியாற்றி வரும் சிறப்பு பயிற்றுநா்களுக்கு பணி பாதுகாப்பு வழங்கும் வகையில் 20 ஆண்டுகாலம் பணியாற்றியதை கருத்தில்கொண்டு கருணையின் அடிப்படையில் அவா்களை பணி நிரந்தரம் செய்ய வேண்டும். பணி நேரத்தில் விபத்தில் சிக்கி சிகிச்சை பெற்று வரும் சிறப்பு பயிற்றுநா் சுமதிக்கு அரசின் சாா்பில் உரிய நிவாரண இழப்பீடு வழங்கப்பட வேண்டும் என அவா்கள் தெரிவித்தனா்.